AMOS STUDIO PHOTO JOURNAL

Thenzawl Khua 24-12-2016 5:10 PM Krismas hmangin Thenzawlah kan kal a, December 22, 2016-ah kan thleng phei a. December 24, 2016 tlaiah Thenzawl veng chhak lamah kan leng chho mai mai a. Amos-a nen Vengthar thleng kan kal. Haw lamah Thenzawl khaw chhung lan theihna atanga thla kan lak lai chuan mipa leh hmeichhe naupang pahnih hi kan bulah lo kalin, "Eng tur nge a?" an rawn ti a. Keini chuan, "Kan haw hunah, 'hei hi Thenzawl khua a nih hi,' kan tih turin thla kan la mai mai," kan ti a. Anni chuan, A piah tlang lam kawh pahin, "Saw lai atang sawn khaw chhung a lang chiang zawk daih asin, SDEO Office atang sawn," tiin thla lakna hmun rem zawk min kawh hmuh a. Chu lam pan chuan kan phei a. Khaw chhung chu a lo lang tha hle mai a. Mahse, a tlai lam deuh tawh avangin, khua a thim tep tawh a. Chu bakah Tiau chhumin Thenzawl veng thlang lam chu a lo bawh paw chiai tawh bawk. Hetiang thla kan la thei hi a nuam kan ti hle. In kan thlen thlak meuh chua...

Kawmthlang Tuikhur 06-12-2016 7:19AM School kawmthlang lungrem thlalak Sorkar-ah thehluh a ngai a. Thla la turin ka fapa nen zingkarah kan kal a. Lungrem thla kan lak zawh hnuin kan haw kawnga Vantlang Tuikhur thla kan la. Tunhma chuan tui thianghlim tak awmna tuikhur pawh a lo ni tawh thin mai thei. Mahse, tunah chuan khawpuia mihring chengte tuikhur hnar lama an lo khawsak tak zel avangin, mihring thli bawlhhlawh tak takin tuikhur hmantlak lohvah a chantir ta a ni.

Chapchar Kût, Aizawl 6-March-2015 11:56 AM Lammual-ah ka fapa Amos-a leh a patea te nen Chapchar Kût hmangin kan kal ve a, Aizawl veng hrang hrang YMA ten Cheraw an kan a, a hmuhnawmin Lammual kal man a awm hle mai.

Tsongo Lake Dec 19, 2015 12:23 PM Staff Trip-in Sikkim kan kal a, China Boarder lama vur tuiin dil zau tak a siam en turin kan kal. A hmun a sang bawk a, a vawt hle. Vurin kawng a tinal a, hmun thenkhatah chuan motor pawh a tlan hlei thei lo a ni. 

Tuiruang, Manipur (March 27, 2014 1:33 PM) Mizo Conference Office-a Media lam hotute hnung zuiin  Kangrengdor, Manipur-ah kan kal a, hawn lamah Sangha an bomb lai kan nang fuh hlauh mai. Ka vawi khat hmuhna a nia. Tui lo invawrh chho lai te a hmuhnawm hle.

A Hmun tak ka hre lo December 16, 2011 3:32 PM  He thlalak hi Delhi-a kan zin tum a, rel atanga ka lak a ni a. Rel kawng bula awmte khawsak hi chu a hniam hmel ve khawp mai. Rel kawng chu inthiar nan an hmang mai a. Hmun awl rem lai an neih chu infiam nan leh tual chai nan an hmang a. An tual chaina chu bawlhhlawh paihna hmun atan an hmang nghal emaw tih turin a hnawk em em bawk. A piah deuhah chuan chu laia chengte khawsakna in che te te a awm a. A chungte chu ruahtui far loh nana an hmuh remchan ang ang an vawm khawm mai emaw tih tur a ni. An chenna in chhungah chuan thil hlu eng tham mah a awm lo vang tih a chiang hle. A piah deuhah chuan in tha ve tak tak a awm a. In tha zawka awmte aiin helai vela chengte hi an hlim loh zawk hmel chuang miah lo thung.

Serchhip October 21, 2015 10:30 PM Kan thianpa Sangmawia nupui neih ni hmanpui turin Chhiahtlangah kan kal a, Miss Hmingi, Sir Mavala leh kei motor pakhatah kan chuang ho. Chhiahtlangah rei vak lo kan chawlh hnuin Serchhipah Sir Mavala te ina riak turin kan tlang. Zanah in chungah kan chho a, Dar 10:30 velah thla a rawn lang tan chauh na a, thla a eng nuam hle.

Vantawng Khawhthla October 21, 2012 11:13 AM Vantawng Khawthla enna Mizoram Tourism sak October 21, 2012 11:11 AM October 20-21, 2012 khan Zoram Danial Pawl Chhantu Inkhawmpui Thenzawlah neih a ni a, Sunday-ah Vantawng Khawhthla enin kan chhungin kan kal..

Dawrpui Vengthar, Tuikual: Aizawl September 28. 2015 7:15 PM Kan u Dr Lalmuansanga Chawngthu-in tlawmngaiin US atangin Tripod min rawn hawnsak a, Tripod thar hmanna tur zawngin kan kawmthlangah thla eng hnuaiah ka chhuk a, Dawrpui Vengthar lamah ka tin a, thla ka la ta a ni...

Brahmaputra December 10, 2013 3:35 PM Class VII Excursion hruaiin Sir BDA, Miss Cicelia Khiangte te nen Guwahati-ah kan kal a. Guwahati Science Centre te, Zoo te kan tlawh zawh hnuin Brahmaputra luiah lawngin kan chuang a, khaw thlang lamah ni a tla dawn suar suar a. a mawi hle.

Maubuang khaw daia Oil/Gas zawngtute chettlatna hmun September 15, 2014 6:36 PM Pu Mama (C. Lalnunmawia) ka nu te unau zinga upa ber chu September 14, 2014-ah Aizawl Civil Hospital-ah a boral a. Chumi zan vek chuan Haulawngah a ruang phurh phei a ni a. A tuk September 15, 2014-ah Haulawng thlanmualah kan vui zawh hnuin, Aizawl lam panin School bus-in ka haw leh nghal a. Tlai khaw thim hnuah Maubuang khaw dai hi thlengin, kawng thlanga Oil/Gas zawngtute awm hmun thla hi ka la ta a ni.

Kelsih Thlanmual May 14, 2016 1:28 Melriat/Kelsih Kohhran member tlem te chu tlawh thin turin Seventh-day Tlang Kohhran te tih kan ni a. May 14, 2016 chu Pu Ramhunthara Tlau, Aizawl Adventist Hospital-a thawk nena kan tlawh ni a nih avangin kan va tlawh ve a. Hemi ni hian Pu Lalchhuanmawia Tochhawng leh Tv. L. Nunchanga ten min tawiawm bawk. Inkhawm banah Kelsih khuaah lutin, an thlanmualah kan leng a, rin ai daihin a lo nuam a. An  khua chu tun hnai lawka din a ni lo tih an thlanlung atangin a hriat theih. An bung zar sei tak an thlanmual zar duai mai te chu a hmuhnawm hle.

Nisarih Tlang Kohhran Biak In June 24, 2016 6:52PM Girls Hostel atangin Luangmual leh Lengpui Airport lam June 24, 2016 6:47PM Friday tlai a ni a, ni tla tur chu a mawiin, khua a eng nuam hle mai a. In chhungah ni tla thlâ la turin ka lawn a. Ka han thlen chuan ni a lang meuh tawh lo naa, chhum erawh a la chhun sen mawi hle. Principal Quarters/Canteen Building thar chungah ka lawn a. Ka haw dawnin Sabbath zan inkhawm dar a lo ri a, Biak In pawh a lo mawi hle a. Tripod ka keng tel hram lo erawh a inchhirawm.

Helen Lowry Higher Secondary School, Aizawl. High Field atangin July 12, 2016 5:42AM Helen Lowry Higher Secondary School, Aizawl. Chanmari West atangin July 12, 2016 6:52AM A hma zanah kan naute Lalremtluangi khawsik avangin kan mu tam vak lo va, a tuk zingah Dr. Lalhmuchhuaka Clinic-a a hming ziak turin hma takah ka tho a, Camera ka ak chhuak bawk a. A hming ka ziah hnu chuan Aizawl tlak lam, kan veng, thla ka la haw nghal.

Vaivakawn, Darpui Vengthar, Chanmari West, Babu Tlang leh Hunthar veng May 17, 2016 5:01 Hemi zing hian khua a nuam vak lo a, Zing hma ve takah thovin, chhum awm loh laia khaw eng mawi tak thla lak tumin kan in chung School Class room ruakah ka han lawn chho va, ka thlen chhoh chuan thli a thaw vuk vuk a. Khaw chhak lam thlir theihna tukverh ka hawng a, tukverh chu thliin a chhem ri leh dawt dawt thin. Hmanhmawh thlak em em lo mah se, thli a thawt nasat avangin hun rei lo te chhungin khaw awm dan a inthlak nasa hman thei hle.

Helen Lowry School kawt, Elementary Section leh Auditorium (July 30, 2016 6:09) July 30, 2016 Sabbath ni, AY inkhawmah Camera ka keng a. Inkhawm bang ka haw chu School Campus angle dang deuh, ni danga ka lak lohna lam atanga lak ve reng rengah heti hian ka la ta a ni. July thla a ni a, hemi ni pawh hian ruah a sur deuh reng a, tlai ni tla tur pawh hmuh tur a awm ngai meuh lo. Mahse, chhum mawi tak tak hmuh tur erawh a awm deuh reng thung.

Khawhpawp, Lawipu, Aizawl (31/10/2016 2:08PM) October 31, 2016-ah Helen Lowry Higher Secondary School, Aizawl Staff Picnic-in Lawipui rama Millions Resort-ah kan kal a. Picnic Spot kan thlen hnuin thianten kan thlang lawkah Khawhpawp a awm tih an sawi a. Chawhnu dar 2:00 velah ka fapa nen a hmuna en turin kan kal ve ta a. Tui a lo tamin, kan kal lai chuan a nelawm lem loh khawp mai. Mahse, kal lo chak ve rauh rauhna hmuna tum lawk em em lova kan han kal ve ta mai chu a hlimawm duh ang reng hle. Khawhpawp hi Mizoram Calendar 2016-ah Hawlhtlang tiin a lang.