Pinehill Principal Qtrs Champhaiah

Pinehill Principal Quarters

Kum 1996 daih tawh kha a ni. Khami kum khan fa lo nei ta ila chu kum 24 a lo ni ve tawh ang a, khami kuma ka kum zat angah khan ka fa chuan fa lo nei ve phei se chu tu mawng ka beng tawh dawn tihna a nih chu.

"Lehkha zir hi ka eizawnna tur a ni lo a niang, motor khalh mai ka duh, a nih loh pawhin tape chhe siam zir ila," tia ka pa hnena ka dil hnuah ka pain, "Champhaiah Kapzauva te nupa an awm a, han kal ve teh, zirtir an thiam a nia," a tih takah chuan January thla tir khaw vawh vanglai takin Aizawl Zarkawt atangin Ahimsa night bus-ah chuangin Champhai chu ka pan chho ve leh ta kha a ni a.

Champhai kan thlen chhohvin a la hma lutuk a Chhungte veng thlen chhoh hma deuhvah khua kan nghak tlaivar a, khawvar hlimah khua kan lut chho ta kha a ni a. Taxi lain Pinehill lam ka pan nghal a. Phai zawl atangin ka mutbu leh thawmhnaw ka pu chho va. Thlasik dai huh avang chuan Pinehill tlang panna kawng chu a berh angreng hle a, ka pheikhawkah chuan chirh a kai luai mai a, ka pheikhawk berhzia ka lo hre lo. Principal Quarters chu tuna Sintax awmna lam atang hian ka pan chho ta a, kawngka ka kik karh karh a, min lo hawnsak a. An chhungkua chu ka vawi khat hmuhna vek an ni. Ka thawmhnaw ka innghat a, ka insawi a, "Pastor Liantluanga fapa ka nia, School rawn lut turin ka lo kal ni a," tih vel te ka sawi a. An lo fel ngang mai. Ka pa avangin min lo ngai pawimawh (der chu ka ti phal lo) niin ka hria a. Ka thla a muang hle. Khual tha lawm tak hian min lo lawm a, an fate pawhin min ko nghal bawrh bawrh mai. An sitting roomah thutthlengseiah ka thu a, ka thutna bul chhuat chu a bal riauvin ka hria a, Ka pheikhawk berhzia leh ka rahna hnu berhzia chu ka zu hmu nghal. Ka va zak tak. Ka pheikhawk ke hnuaia lei la chah bur mai te chu ka hmu nghal vek. Mahse tihngaihna a awm tawh lo. Chuti chung chuan chhuat bal chu ngaimawh awmin tu mah an awm lo! An nula Julie kha chuan a rilru tak chuan min lo ngei ru viau pawh ni se a thiamawm hliah hliah.

Hmanah Shillongah pawh: Vawi khat chu Shillonga ka kalin, khawlaiah keimahin ka tei mai mai a. Hun ka la neih tho avangin North East India Union Office ka pan a, "Pastor Chansanga te inah ka'n lut mai mai teh ang," tiin ka tei lut a. Ani chu a lo awm lo, a nupui Pi Mawii a lo awm a. Kawngka min lo hawn, min hre lo. Min hriat ngaihna a awm lo reng a. Kei chuan, "Danmawia ka nia, Pastor Liantluanga fapa," tiin ka insawi a. Ani pawh kha a va han fel tak, ei leh in tur min laksak a, min pe nghal sawk sawk a. Ka haw dawn a min thlahna tawngkam kha ka theihnghilh thei lo, "Pastor Liantluanga fapa i nih ngat chuan kan inah hian inthlahrung reng reng suh. Lo kal ziah ang che," tiin min thlah a ni. Ka pa fapa ka nih avanga kha tawngkam ka dawng kha ka theihnghilh theih tawh loh tur a ni.

Tukthuan ei khamah Sangtea (Sir Tluangtea nau, tuna Pastor Sangtea ni ta) leh Tea (Andrew Manga, College-a ka thianpa ber ni ta) te, chu leilet zawl lui/tuikhurah an insu dawn a, min sawm ve a. Ka zui ve. Naupang Christina-i leh Nl. Julie te nen kan suk tur keng chuan kan inzui thla dam dam a. Tuna Pastor Lalthankamlova te in awmna velah hian (ni tain ka hria) tuikhur a awm a. A lan theih tirh atang chuan thiante chuan, "Khu tute emawni an insu ve a nih khu... tute nge le? E, Malsawmi te unau an insu ve a nih khu... Malsawm, Malsawm," an tia an au vak vak a. 'Malsawmi' an tihte pawh chuan an rawn chhang a, thlen thlak hma hmain an bengchheng nghal hle.

Zan lamah an titi-ah chuan Thawhuama hi an sawi pek a. An sawi dan chuan, pa lian deuh hah hmel taka thaw huam huam ri hi a ang ber an ti. An hlauh hmel hlawm hle. Zan khat chu chutiang thawm chu hre tlatin ka inhre pek a. Champhai January thla khaw vawtah rizai hnuaiah ka thlan ve deuh dep.

Tichuan, zan 2/1 vel chu he quarters-ah hian thlamuang takin ka khawsa ve a, a hnuah chuan school luh te a lo hun tak avangin Boys Hostel lamah ka insawn ve ta a.