HMANAH KAN NAUPAN LAIIN
 |
| Thenzawl AO Quarters thin (Thla lak ni: August 1, 2019, 5:16AM) |
An chokaah chuan vur siamna bawm te an nei a. An vur siamna bawm chungah chuan thei leh chawhmeh her sawmna khawl a awm bawk a. Vur siamna leh thil her sawmna khawl kha a inzawm emaw ka ti char char. Ka thianpa nen chuan vur te kan ei thin a, an tui vawt te pawh kan in thin. Vawi khat chu vur siamna bawma vur bet chu kan liak a, kan lei a tang a, kan buai dun hle. Rin aiin a lo nghet duh. Lawmpara nuin thil ei tur min pekte kha a va han tui thei tak.
An ina kan kal chang hian 'Tape' kan ngaithla thin a. Lalnunmawia (Valtea) hla "Di Thangpui, ka ngai em che fam zun leng ngai iang rengin luaithli nulin ka au ruai che," tih lai kha kan hriat ang angin kan zawm vek ngei zel. A awmzia kan hre tak tak pawh a ni si lo.
An in bulah hian Kudam (Godown) a awm a, kan tei lut ve fo a. (Lawmpara pa kha a thu ber a ni bawk a) Buhfai bag rit deuh deuh motor-a an hlang lai te kan en reng thin a, khatianga chak nih ve te kha kan chak thin.
Vawi khat chu Thenzawl khaw daia an dil (Tunah chuan Pu Lal Thanhawla dil a ni ta)-ah kan kal a. Arbawm hi dilah kan chiah teuh a. A hnu rei vak lovah kan khai chhuak leh thin a. Kaikuang a lo bet fur thin a, nuam kan ti hle.
He inah hian AO te chhung chu an cheng reng lo va. NEC kawng lam (Lunglei Road)-ah in an sa a, tah chuan an cheng zui ta a. Chuta an chen hnu pawh chuan kan inkawm zui zel a, A nau Mimi-i te, (a nau leh hming ka theihnghilh tak te) an naupang ber Pusitea (ni tain ka hria) te kha kan biak inah an rawn inkhawm ve thin a. Inkhawm tur hian ka va sawm nal nal thin. Ka la hriat reng chu - Vawi khat chu inkhawm turin ka va sawm leh a. A nu chuan an naupang ber chu T-Shirt haktir a tum a, ani chuan kamis a ha duh a. A nu chuan, "Hei i u Dana pawhin T-Shirt a hak hi," a ti a. Ka hak lai kha T-Shirt a ni tih ka hre ve chiah. Khami hma khan eng nge T-Shirt nia, eng nge Kamis tih ka hre lo reng reng. Kamis chu inkhawm nan an ha thin a, T-Shirt chu inkhawm lohnaah tih vel phei chu hre lo tak ka ni.
A pa Pu Enga pawh kha a bula awm nuam tak mai a ni a, "Mizorama pa sang ber" tih kha keini naupang hriat dan kha a ni mai a. Sang tak a ni, a bula ka din khan a kawng thleng vel ka ni (...in ka hria). (Kum 10 ka la tlin hma a ni bawk a). "Jeep an nei a, mahse a khup a sei lutuk a, a seat an modi tawp chuti lo chuan a khalh thei lo," tihte kha naupangin kan sawi dan kha a nia.
Lawmpara pa chuan min be ve fo thin. An in thar chu compound zau zawl nuam tak nei a ni a. Sangha dil zau pui mai an nei bawk a. Tui pump-na khawl te reuh te, tha zet hi an nei a. Vawi khat chu Lawmpara nen an ina kan awm lai chuan, "Min lo pui lawk teh u," a tia. A tui pump-na hmunah chuan min ko thla a. Kan zu kal a, a khawl chu a ri cher cher a, tui a lo haw thei lawk lo va. "Han ngaithla teh u," a tia. Kan inngaihthlak chhawk a. "Kan inrin loh laiin tuiin min rawn phut thut a, kan lu atangin kan huh a, khami tum kha chuan a nuih a za ve khawp mai.
An in bul sangha dilah chuan sangha an tam khawp mai a. Sangha chaw chu tui chim chin vaukamah hian kan dah a, an rawn ei thin a. Kan kutin sangha chaw chu kan keng a, tuiah chuan kan zu zen a, kan kuta mi chu an rawn ei sup sup thin. Kan kutzungtangte chu an rawn hmuam thin. A nuam kan va ti thin tak.
An in chhak kawng chhaka electric ban kua, kutzungtang leng vela khuaibu kan hawlh a, min khuaiin min zuk te kha ka la hre reng mai.
Comments
Post a Comment